LAOAG CITY – Natay ti maysa a lalaki kalpasan a nalmes iti karayan iti paset ti Barangay Hilario iti ili Banna.
Ti biktima ket agtawen ti 34, awanan ti asawa, driver, taga Brgy. Otan, Allacapan, Cagayan.
Basar iti Philippine National Police, iti oras ti alas-nuebe ti bigat idi kalman, Abril 2 ket napan ti biktima kadwa na dagiti kakasinsin na iti karayan tapno agpipiknik, no sadinno nga idi adda dan iti lugar ket naggiinom dagitoy ti arak.
Kalpasan na ket napan da nagdidigus, ngem agarop maysa nga orasen idi naripar da a saan pay nga limmung-aw ti biktima isut gapuna a biniruk da daytoy.
Apaman a nakita da ti biktima ket intaray da a dagus iti Marcos District Hospital iti ili ti Marcos ngem indeklarar ti attending physician a ni Dr. Evelyn Gay B. Dela Cruz, a pimmusayen gapu iti asphyxia secondary to drowning ken awan ti pagilasinan nga adda ti foul play a napasamak.
