LAOAG CITY – Naaprobaran iti maikadua a pannakaibasana ti pannakaamendar ti Revenue Code mainaig iti hospital fees ditoy probinsia.
Segun ken ni Sangguniang Panlalawigan Member Hanson Chua, nagkiddaw ti tulong ti hunta probinsial kadagiti doktor maipanggep iti daytoy a mailunglungalong a gakat.
Inbatadna a gagem daytoy a gakat tapno maipababa ti singir kadagiti mabaybayadan iti ospital ditoy probinsia.
Inbatadna nga iti agdama ket maymaysan ti presio dagiti amin nga ospital nga adda iti babaen ti Provincial Government of Ilocos Norte nga iti dati ket agduduma ti presio ti Gov. Roque Ablan Sr. Memorial Hospital ken dagiti district hospitals.
Inlawlawagna a nagpaut ti agingga iti tallo nga aldaw ti panang-consolidate-da ti presio dagiti amin nga ospital pakairamanan dagiti pribado a balay-pagagasan.
Kunana a nangisayangkatda ti benchmarking mainaig iti presio manipud kadagiti government hospitals wenno dagiti maibilang a Department of Hospital kas ti Mariano Marcos Memorial Hospital and Medical Center ken dagiti pribado nga ospital.
Inpettengna nga amin a presio ti serbisio medikal kadagiti ospital ditoy probinsia ket naipababa kas iti blood test, hospital bed ken dadduma pay.
