LAOAG CITY – Adda iti umuna a puesto ti Laoag City iti partial and unofficial medal tally iti Region 1 Athletic Association Meet.
Segun ken ni Mr. Cesar Bucsit, pannakangiwat ti Department of Education – Region 1, mamati daytoy a gapu iti kinapaut ti panagsanay dagiti atleta manipud iti nasao nga Schools Division Office ket napintas ti agbalbalin a resulta ti panagay-ayamda.
Inbatadna a dakkel pay a tulong kadakuada ti ipapaay a suporta ti maseknan nga Schools Division Office ken Local Government Unit pakairamanan ti gagar dagitoy a magun-od ti balligi.
Inlawlawagna a no bilang mangabak ti Laoag City iti Region 1 Athletic Association Meet ita a tawen ket maibilang dagitoy a three-peat kalpasan a nag-back to back champion-da kadagiti naglabas a dua a tawen ken isuda ti makibinnalubal iti Palarong Pambansa a maisayangkat idiay Agusan Del Sur.
Kunana nga awan met dagiti seryoso nga aniaman a problema wenno insidente a napasamak iti agtultuloy a pannakaisayangkat ti naindaklan nga sporting event.
Innayonna a basar iti kaudian a datos ket nakagun-od ti Laoag City ti 23 a bronze medals, 5 a silver medals ken 12 a gold medals.
Kabayatanna, adda iti maikadua a puesto ti Ilocos Sur, maikatlo a puesto ti Ilocos Norte idinto nga adda iti maudi a puesto ti Batac City.
