LAOAG CITY – Inbatad ni Barangay Chairman Joker Ganal iti Barangay Juan iti ili ti Solsona a napan da a dagus ininspeksyon ti pasdek nga inreklamo dagiti kabarangayan da ken uray dagiti motorista kalpasan a nagpa-extension ti akinbagi a ni Dra. Manuel a nakaokuparan na ti paset ti national highway.
Inlawlawag ti kapitan nga iti panangrukud da ket naduktalan a nasakupan ti extension ti pasdek ti right of way, a nalawag a mailabsing iti linteg.
Masdaaw pay ni Ganal gapu ta saan a naipakada iti opisina na ti panagpa-extension ti nasao a pasdek.
Kuna na a nagsurat metten ken ni Engr. Jim Domingo, ti Municipal Engineer iti nasao nga ili tapno amwen no ammo da ti naaramid nga extension iti pasdek a kukua ni Dra. Manuel.
Innayon na nga iyur-uray na laeng ti sungbat ni Engr. Domingo gapu ta isu ti pagibasaran da iti sumaruno nga addang da.
Mainaig iti daytoy, nagpanawagan ni Barangay Chairman Ganal kadagiti kabarangayan na a no agpatakder iti balay wenno pasdek ket masapol a suruten da ti paglintegan tapno awan ti tumaod a problema.
