LAOAG CITY – Inlawlawag ni House Committee on Good Government and Public Accountability Chairman ken Manila Rep. Joel Chua a ti naikeddeng a panagdengngeg inton Abril 14 para iti impeachment case kontra ken ni Vice President Sara Duterte ket limitado laeng kadagiti clarificatory question ken saan a naan-anay a maysa a panangtingiting.
Inbatad ni Chua, ti proseso iti Kamara de Representantes ket paset pay laeng ti preliminary investigation.
Inpetteng ti Kongressista nga awan ti mapasamak a cross-examination iti daytoy a tukad gapu ta ti nasao a proseso ket eksklusibo nga ar-aramiden iti Senado.
Kunana a ti panagusar iti termino a ‘mini-trial’ ket simple a panangiladawan laeng.
Inimbitaran iti nasao a panagdengngeg ti sumagmamano a napapateg a resource persons pakairamanan dagiti opisial manipud iti Commission on Audit (COA), Bureau of Internal Revenue (BIR), NBI, SEC ken ni Ramil Madriaga a maitudtudo a “bagman” ti Bise Presidente.
Gagem ti panagpaayab kadagiti testigo a masigurado ti otentisidad dagiti pirma ken affidavit nga insubmitir iti komite.
Inladawan ni Chua ti papel ti komite iti maysa a prosecutor a mangar-arisit no adda ti umdas a pagibasaran dagiti alegasion tapno ituloy ti kaso.
Iti baet daytoy, inpasigurado ti agpanpanday linteg nga iresrespetar ti due process ken ik-ikkan ti umdas a panawen iti kampo ti Bise Presidente a makasungbat iti babaen kadagiti pagannurotan ti Konstitusion.
