LAOAG CITY – Naduktalan ti Department of Agriculture (DA) iti babaen ti National Food Authority (NFA) ti sumagmamano a peke a benepisiario ti programa a “Benteng Bigas, Meron Na!” iti baet ti kinaadu dagiti agkalikagum a makagatang ti nalaka a bagas.
Segun iti ahensia, adda ti sumagmamano a makipilpila kadagiti Kadiwa store nga agus-usar ti peke nga ID ken dokumento tapno makagatang ti P20 iti kada kilo a bagas.
Gapu iti daytoy, nagpanawagan ni Assistant Secretary Genevieve Velicaria-Guevarra, mangidadaulo ti Kadiwa ng Pangulo Program a saan nga abusoen ti sistema tapno saan a maagawan ti benepisio dagiti lehitimo a benepisiario.
Kas sungbat, ad-adda a pinaigetan ti programa ti online system-da tapno maliklikan ti panaggundaway.
Inpasigurado ti National Food Authority a dagiti laeng vulnerable sector ti mabenepisiaran ti P20 iti kada kilo a bagas nangruna iti baet ti krisis iti langis.
