LAOAG CITY – Inpakaammo ni Mr. John Dancel, mangidadaulo ti Municipal Tourism Office nga agtultuloy ti panagsagsaganada para iti Little League Philippine Series.
Segun kenkuana, kagiddan iti daytoy ket agtultuloy met ti panangpapintasda kadagiti nagduduma a tourist destination tapno ad-adda a naragsak iti isasangbay dagiti umaayam.
Inbatadna a manamnama nga umabot iti 700 dagiti bisita a makipaset iti naindaklan nga sporting event nangruna kadagiti agay-ayam iti Ilocos Norte Agricultural College.
Kunana nga agtalinaed dagitoy manipud Abril 17 agingga 25 iti ili ti Pasuquin.
Maipalagip nga inlawlawag ni Dancel a dakkel ti nagbabaan ti bilang dagiti turista nga agturturong iti ili ti Pasuquin no sadinno a no idasig iti napalabas a tawen kadaytoy a panawen ti kalgaw aglalo iti naglabas a Semana Santa ket adda ti mairekordda a 500 agingga iti 1,000 a turista nga agpasiar ngem iti agdama ket narigat pay nga umabot iti 300 nangruna iti sexy beach a maibilang a prime destination dagiti turista iti ilida.
