LAOAG CITY – Nakasaganan ti Ilocos Norte a mangakomodar kadagiti delegado para iti Little League Philippines.
Segun ken ni Mrs. Helen Rose Domingo, mangidadaulo ti Provincial Sports and Development Office, dagiti dadduma a delegado ket nakasangpeten iti ili ti Banna, Bacarra ken ditoy siudad ti Laoag idinto nga adda pay dagiti agtalinaed kadagiti hotel.
Inlawlawagna nga umabot iti 168 teams ti manamnama a sumangbay ditoy probinsia.
Kunana nga adda ti 19 nga sporting venues dagiti umaayam pakairamanan iti ili ti Banna, Pasuquin, Vintar, Burgos, Dingras, Bacarra Comprehensive National High School, Ilocos Norte Agricultural College, Gabaldon ken Ferdinand Edralin Marcos Stadium.
Inbatadna a manamnama a mangipatulod ti pannakabagi ni Sen. Bong Go, Chairperson ti Senate House Committee ti Youth and Sports para iti naindaklan nga aktibidad.
Innayonna nga iti agdama ket iyur-urayda dagiti delegado manipud iti Tanauan, Batangas.
Kabayatanna, inpakaammo ni Mr. Michael Zialcita, District Administrator ti Little League Philippines a ti mangabak iti daytoy ket isu ti mangibagi ti Pilipinas iti Asia Pacific.
