LAOAG CITY – Nakaruaren iti pagbaludan ti maysa a lalaki a naarestar iti napasamak a pammaltog iti Barangay 7, Sta. Cruz iti ili ti Badoc iti kallabes.
Ti suspek ket agtawen ti 51, naasawaan, driver ken residente iti nasao a barangay idinto a ti biktima ket agtawen ti 38, awanan asawa, mannalon ken residente met iti Barangay Caraitan iti ili ti Badoc.
Inbatad ni P/Lt. Jonathan Alonzo, Deputy Chief of Police ti Badoc Municipal Police Station, daytoy ket kalpasan a nagpiyansa ti 10 ribu a pisos para iti temporario a pannakawaya-wayana.
Inlawlawagna nga awan ti lisensia ti paltog nga inusar ti suspek iti krimen.
Kunana nga adda ti dati a susik iti nagbaetan ti biktima ken suspek iti saan pay a masinunuo a rason.
Maipalagip a kabayatan a magmagna nga agpapaamianan ti biktima iti Barangay 7, Sta. Cruz iti ili ti Badoc ket kellaat lattan a pinaputukan ti sumagmamano a daras ti suspek.
Nupay kasta, nagasat ti biktima gapu ta saan a natamaan ken nakataray a napan nagkiddaw ti tulong ken ni Barangay Chairman Judy Bautista iti Barangay Caraitan iti ili ti Badoc.
Immuna iti daytoy, nakarekobre dagiti otoridad ti tallo nga empty cartridge cases ti 9mm caliber.
