LAOAG CITY – Inpetteng manen ni Senate President pro-tempore Ping Lacson a dagiti ebidensia laeng ti pagibasaran ti agbalin a desisionda iti impeachment trial kontra ken ni Vice President Sara Duterte.
Inbatadna a daytoy ket mainaig iti rimmuar a report nga addan ti desision ti sumagmamano a Senador iti impeachment case ni Vice President Sara uray saan pay a naiyuli daytoy iti Senado.
Inlawlawagna a nakaad-adu dagiti sayangguseng ken awan ti serserbina nga ibatbatoda kadakuada a 24 a senador a tumakder kas senator judges.
Kunana nga adda dagiti rumrummuar nga adda dagiti senador ti sigurado nga i-convict wenno iwaswas ti basol ni Vice President Sara.
Nupay kasta, maysa laeng ti ipaspasigurado ni Lacson nga isuda ket agdesision basar kadagiti naidatag nga ebidensia iti impeachment trial.
