LAOAG CITY – Inrakurak ni Senador Panfilo “Ping” Lacson nga awan ti makitkitana a pangta iti liderato ni Senate President Vicente “Tito” Sotto III uray maaddaan pay ti impeachment trial kontra ken ni Vice President Sara Duterte.
Inbatadna nga agtaltalinaed a natibker ti majority bloc ti Senado a pakairamanan da Sotto, Lacson, Senate Majority Leader Migz Zubiri ken dagiti senador nga isuda Bam Aquino, Pia Cayetano, Risa Hontiveros, Kiko Pangilinan, Mark Villar, Camille Villar, JV Ejercito, Lito Lapid, Win Gatchalian, Erwin Tulfo ken Raffy Tulfo.
Kunana nga ad-adalenda ken ni Sotto ti Rules of Court ken Revised Rules on Criminal Procedure kas panagsagsagana no bilang matuloy ti impeachment trial.
Innayonna a binalakadanna ni Sotto nga agsagana iti posible nga addang ni Senador Rodante Marcoleta, maysa nga am-ammo ti alyado ni Duterte a mabalin a mangkontra iti impeachment trial.
