LAOAG CITY – Inakusaran ni U.S. President Donald Trump ti Iran ti “total violation” iti maipatpatungpal a ceasefire kalpasan ti maipagarop a panagpaputok na kadagiti barko iti asideg ti Strait of Hormuz.
Iti maysa a social media post, nagpangta manen ti presidente ti Estados Unidos a dadaelen ti napapateg nga imprastraktura ti Iran no saanna nga awaten ti ididiaya a katulagan ti Washington.
Segun ken ni Trump, naikeddeng a sumangpet iti Pakista intono rabii dagiti mangibagi ti Estados Unidos tapno ituloy ti negosasyon iti Iran, iti baet ti kumarkaro a tensyon.
Immuna iti daytoy, bimmaba ti world price ti langis ken ngimmato ti stock markets kalpasan nga inrakurak ti Iran a lukatan na ti Strait of Hormuz a maibilang kas maysa a kapatgan a pagnaan ti langis iti lubong a temporaryo a pinaserraan ti Iran kalpasan ti military operations ti Estados Unidos ken Israel idi Pebrero 28 ita a tawen.
Nupay kasta, kalpasan nga inrakurak ni Trump nga agtultuloy ti blockade kontra iti Iranian shipping, inbatad ti Tehran nga agtalinaed a nakaserra ti nasao nga strait.
Iti agdama, saan pay a nalawag no malukatan manen ti Strait of Hormuz ken no maaddaan ti pagdurdur-asan ti negosasyon ti ceasefire.
