LAOAG CITY – Tiniliw ti Iran ti dua a barko iti Strait of Hormuz basar iti baet ti agtultuloy a tension iti rehion ken saan a nalawag nga estado ti ceasefire negotiations.
Basar iti report, inwayat ti Islamic Revolutionary Guards Corps ti pananglapped iti dua a barko gapu iti maipagarup a maritime violations a naikabil dagitoy iti kabaybayan ti Iran.
Daytoy ti umuna a report ti aktual a panangtiliw ti barko sipud idi nangrugi ti rinnupak.
Kagiddan daytoy, inpakaammo ti British maritime security agency nga adda ti tallo a barko pay ti tinamaan ti bala ti paltog iti nasao a pagdalyasatan ti langis a maysa kadagiti kapapatgan a shipping route iti lubong.
Iti baet ti riribok, inbatad ni United States President Donald Trump a temporario nga insardeng ti plano a panangatake iti Iran kalpasan a maipagarup a nagkiddaw ti Pakistani mediators nupay saan pay a nalawag ti maminsan manen a panangrugi ti peace talks.
Nupay kasta, inpetteng ni Trump ti agtultuloy a presensia ti Estados Unidos naval blockade kontra kadagiti barko ti Iran.
Kuna met ti Iran a ti blockade ket ibilangda kas “act of war” ken nagballaag a saan daytoy a lukatan ti Strait of Hormuz agingga nga agtultuloy ti pananggipit ti Amerika.
Kabayatanna, agtaltalinaed a saan a nalawag ti direksion ti peace talks iti Islamabad kalpasan a maipagarup a saan a matuloy ti manamnama a panagtataripnong dagiti delegado ti Amerika ken Iran iti baet ti agtultuloy a gubat mainaig iti nuclear program ti Tehran ken panangkontrol iti Strait of Hormuz.
