LAOAG CITY – Naipaayanen ti fuel subsidy dagiti tricycle drivers ditoy ciudad ti Laoag.
Segun ken ni Mayor James Bryan Alcid, adda ti nasurok a 4,300 dagiti tricycle drivers a naipaayan ti fuel subsidy, a ti pondo ket aggapo a mismo iti gobierno lokal ditoy ciudad.
Inbatad ti mayor a dagiti benepisiaryo ket dagiti Tricycle Operators and Drivers’ Association ken barangay franchise iti intero a siudad.
Naamoan a nakaawat ti 3 ribo a pisos ti kada tricycle driver kas tulong ti gobierno lokal ditoy ciudad kadakuadagapu iti nangato a presio ti gasolina.
Inpasingked ni Mayor Alcid nga agtultuloy ti panangkita na ti sektor ti transportasion gapu ta isuda ti kangrunaan a maapektaran ti panagngato ti presio ti petrolyo.
Malaksid kadagiti tricycle drivers, sumarsaruno a maipaayan ti fuel subsidy/cash assistance ket dagiti jeepney drivers, mannalon ken mangngalap ditoy siudad.
Inlawlawag ti mayor a cash ti naited kadagiti tricycle drivers ditoy ciudad imbes a voucher.
Immunan nga inrakurak ti mayor nga imbes a maipangato ti plete iti tricycle ditoy ciudad ti Laoag ket maipaayan laengen ti fuel subsidy dagiti apektado a tricycle drivers.
