LAOAG CITY – Iresrespetar ti Malacañang ti nagbalin a desision ti International Criminal Court (ICC) a kumpirmaren dagiti kaso a crimes against humanity kontra ken ni dati a Presidente Rodrigo Duterte.
Inbatad ni Palace Press Officer Claire Castro, napateg a magun-od ti hustisia, panagsungbat ken due process para iti agsinnungbangir a partido.
Kunana a ti hustisia ti magun-od ti akusado no mapaneknekan nga awan ti basolna kasta pay kadagiti biktima no mapaneknekan met a nalabsing dagiti karebbenganda.
Inlawlawag ti Palasyo a ti panangikabil ken ni Duterte iti The Hague ket saan a tapno sumurot iti pammilin ti International Criminal Court no diket maiyataday iti maipatpatungpal a linteg ti Pilipinas ken iti relasion ti pagilian iti Interpol.
Iti maipapan ti panawagan a maminsan manen a makisali ti Pilipinas iti International Criminal Court, kuna ti Palasyo nga agtaltalinaed ti takder ni Presidente Ferdinand Marcos Jr. a saan pay nga umno a panawen iti agdama.
