LAOAG CITY – Nakita a maysan a nalamiis a bangkay ti maysa a lalaki iti Barangay Pangil iti ili ti Currimao.
Segun ken ni P/Capt. Melvin Soriano, Hepe ti Currimao Municipal Police Station, adda ti maysa a concern citizen ti nangipakaammo kadakuada maipanggep iti insidente kalpasan a mapan koma agdigos daytoy iti baybay ngem nariparna nga adda ti bangkay nga agtatapaw.
Inbatadna a basar iti medical assessment ti doktor ti Rural Health Unit ket awan pay ti 12 nga oras a pimmusay ti biktima.
Inlawlawagna a nabigbig ti biktima babaen ti nakita dagiti otoridad nga identification card manipud iti nakasuot a bag-na no sadinno a naammoan a residente daytoy iti Barangay 17, Tabug iti siudad ti Batac.
Nupay kasta, nagkedked pay laeng ni P/Capt. Soriano a mangipublikar ti dadduma pay a pakabigbigan ti biktima gapu ta manarimaan ti maiwaywayat nga imbestigasion.
Kunana a nakikoordinarda iti Scene of the Crime Operatives tapno maammoan no adda ti foul play a napasamak wenno awan ken no kasano a nakadanon ti biktima iti lugar.
Innayonna nga iti agdama ket temporario a maipawil nga agturong iti rock formation iti Barangay Pangil iti ili ti Currimao kabayatan a maiwaywayat ti imbestigasion.
