LAOAG CITY – Inbatad ni Department of the Interior and Local Government Secretary Jonvic Remulla a bimmaba iti 50 a porsiento ti mapaspasamak a krimen iti intero a pagilian sipud inpatungpal ti ahensya ti Safer Cities Initiative mainaig iti pannaka-iyimplementar ti curfew para kadagiti menor de edad ken dadduma pay nga ordinansa a pagsayaatan ti publiko.
Inpanakkel ni Remulla a ti napintas a nagdur-asan ket marikna saan laeng nga iti major urban centers no di ket uray kadagiti probinsya ken ili iti intero a pagilian.
Inrakurak ni Remulla a ti peace and order ket magun-od babaen ti umiso a pannakaimplementar ti linteg ken naan-anay a kooperasyon kadagiti barangay, police ken local governments.
Kabayatanna, naobserbaran pay ti Philippine National Police (PNP) ti agtultuloy a panagbaba ti bilang dagiti matiltiliw no sadinno a manipod iti agarop 11,000 agingga iti 13,000 kadagiti immuna nga aldaw a pannakaimplementar ti Safer Cities Initiative ket bimmaba kadagiti naglabas a lawas.
Basar iti datos ti Metro Manila police districts, addan ti nairekord dagiti otoridad ti pakabuklan a 185,691 violators.
