LAOAG CITY – Dakkel ti panagyaman dagiti atleta ti taekwondo iti mall ditoy ciudad ti Laoag iti panangipaay da ti oportunidad a mausar ti nasao a pasilidad a pagsanayan da.
Segun kenni Coach June Bumanglag, Team Hwarang Ilocos Norte Taekwondo Chapter, dakkel a makatulong daytoy kadakuada iti panagsagsagana da iti pannakaisayangkat ti Palarong Pambansa intono May 24, 2026 idiay Agusan Del Sur.
Kunana nga adda ti pakabuklan nga innem a gold medalist ti lumaban para iti Palarong Pambansa a mangirepresentar iti rehion 1.
Malaksid iti daytoy, inpakaammo ni Bumanglag nga adda pay ti summer training nga isaysayangkat ti grupo da iti dakkel a mall para kadagiti agkalikagom a makasursuro iti taekwondo.
Innayon na a silulukat pay laeng daytoy para kadagiti kayat na ti agenrol.
Kabayatanna, inrakurak ti Gold Medalist a ni Victoria Min-ah Abian, a nasaysayaat ti panagsanay da gapo iti espasyo a naipaay kadakwada iti nasao a pasilidad.
Namnamaen na a babaen iti daytoy a wagas ket ad-adda a mapapintas ti panagsanay da tapno sigurado nga agballigi da manen iti Palarong Pambansa.
Mainaig iti daytoy, kuna met ti SM management a ti lugar ket saan laeng a pakagatangan kadagiti nagduduma a produkto no di ket mabigbig pay kas lifestyle destination gapo ta ti nasao a mall ket agserbi kas active hub iti pannakasanay ti potensial dagiti tattao.
Innayon da a ti panangipalubos da a mausar ti pasilidad da ket wagas ti panangsuporta da kadagiti atleta ditoy probinsiya tapno magun-od da manen ti balligi ken mangipakita ti panagtakem ti mall iti Sports Development Compose.
