LAOAG CITY – Inpasingked ni Ilocos Norte Water District General Manager John Teodoro nga adda ti makaumanay a suplay ti danom para kadagiti member consumers da ita a summer season.
Inlawlawag na nga iti baet daytoy ket adda dagiti sumagmamano a rason no apay nga adda dagiti consumers a makapasar ti panagbassit wenno panaglibeg ti danom da ita a panawen.
Kuna na a maysa ditoyen ti pannakadalapos dagiti tubo da kadagiti maiwaywayat nga infrastructure projects.
Inbatad na nga adda dagiti pasamak iti kallabes a saan nga ipakaammo kadakuada dagiti kontraktor nga adda ti nadalapos da a tubo ti Ilocos Norte Water District no sadinno a maamoan da laengen no adda ti residente nga agreklamo iti opisina da.
Segun kenni Teodoro, daytoy ti mangitunda ti panagkapsot ti pressure ti danom no tarimaanen dan aglalo no magabot ken balbaliw a mainstolar ti tubo.
Innayon na a kabayatan daytoy ket ada pay dagiti gundawag nga adda ti sumrek a darat ken daga a rason ti panaglibegan ti danom.
Malaksid kadagitoy, kuna na a no dadduma met ket gapu iti power interruption.
