LAOAG CITY – Inpasigurado ti International Criminal Court (ICC) nga agbalin a patas, impartial ken independent ti panangusigda ken ni dati a Presidente Rodrigo Duterte.
Inbatad ni International Criminal Court spokesperson Oriane Maillet nga inikkanda ti umdas a panawen ti defense team ti dati a Presidente para iti dandanin a panagdengngeg iti sangsangoenna a kaso a crimes against humanity.
Inlawlawagna nga agbalin a nalawa ti panagdengngeg ti International Criminal Court a daytoy ket at-atiddog maidasig kadagiti national level.
Ti nasao a klase ti krimen ket kasapulan ti nadagsen nga ebidensia a maidatag iti korte ken naruay a karit ti sangoen iti panagdengngeg.
Maipalagip nga idi Abril 23 ket kinumpirmaran ti International Criminal Court Pre-Trial Chamber ti crimes against humanity kontra ken ni Duterte.
Maiwayat inton Mayo 27 ti Trial Chamber III ti status conference.
Innayonna nga ipaimadan kadagiti trial judges ti panangikeddeng ti schedule para iti panaglukat ti panagdengngeg basar iti panangisubmitir dagiti partido ti kaso.
Ti panagdengngeg ket maipublikar no sadinno a daytoy ket mabuya ti live iti online.
