LAOAG CITY – Posible nga inton Hunio pay a mangrugi ti panangtingiting iti impeachment complaint kontra ken ni Vice President Sara Duterte uray nga insigida pay nga ag-convene ti Senado kas impeachment court iti kanito a maawat ti Articles of Impeachment manipud iti Kamara de Representantes.
Inbatad ni Senate President Pro Tempore Panfilo “Ping” Lacson, kasapulan pay ti saan a bumaba iti tallo a lawas a panagsagsagana sakbay a naan-anay a mangrugi ti trial.
Kunana a dagiti karaman a proseso a kasapulan ket ti panangipatulod ti summons, panangawat ti sungbat ti depensa ken panangiwayat ti preliminary conference wenno pre-trial tapno nalawag dagiti isyu a talantanen ken ebidensia nga idatag.
Inpetteng ti senador ti kinapateg ti nasapa a pre-trial tapno maliklikan ti pannakaulaw kas iti napasamak iti impeachment trial ni dati a Chief Justice Renato Corana.
