LAOAG CITY – Nagpanawagan ni dati a Senate President Koko Pimentel kadagiti senador a possible nga agserbi a korte iti impeachment trial ni Vice President Sara Duterte a pagpannurayen ti konsensya da iti panagdesisyon iti kaso.
Iti maysa nga interview, inpetteng ni Pimentel a nakadependar iti personal a panagdesisyon iti kada senador ti agbalin a sentensya iti impeachment trial.
Kuna pay ni Pimentel a saanen a maisuro no kasanu ti agdesisyon, ngem addan iti konsensya dagiti senador no umdas ti ebidensya wenno saan.
Segun kenkuana, obligasyon dagiti senador a timbangen dagiti ebidensya nga ipasango dagiti kameng ti kamara de representantes, a no mapaneknekan nga umdas dagitoy ket rumbeng a masentensyaan ti opisyal ngem no saan ket rebbengna laeng a maabsuwelto.
Malaksid iti daytoy, ginutigot pay ni Pimentel ti Senado nga iyalisto ti proseso ti impeachment trial tapno maamoan a dagus ti publiko ti agbalin a desisyon dagiti senador.
Ni Pimentel ket karaman kadagiti senador a nagbotos tapno sentensyaan ni dati a Chief Justice Renato Corona iti 2012 impeachment trial, maysa a kapadasan a maibilang a mangipakita ti nadagsen a responsibilidad dagiti senador iti kastoy a proseso.
Immunan nga inpetteng ni Pimentel nga iti babaen ti Konstitusyon, obligasyon ti Senado a dagus a rugyan ti panangusig iti kanito a maisumitir ti articles of impeachment manipod iti Kamara de representantes.
Innayon na a ti sarita a “forthwith” ket kaipapanan ti “dagus,” isut gapuna a saan a rumbeng a maitantan ti proseso.
