LAOAG CITY – Binilin ni Presidente dagiti ahensya ti gobierno a dagus a tulungan dagiti komunidad a naapektaran ti ashfall manipod iti Mayon Volcano, partikular dagiti ili ti Guinobatan ken Camalig iti probinsya ti Albay.
Segun iti Presidential Communications Office (PCO), naiget ti isaysayangkat a response operations ti gobierno tapno maprotehiran ti salun-at ti publiko, masigurado ti seguridad dagiti residente ken mapagtalinaed a silulukat dagiti kalsada ken napapateg a serbisyo kadagiti apektado a lugar.
Indaulwan ti Department of Public Works and Highways (DPWH) iti clearing operations tapno ikkaten dagiti nabengbeng a dapo kadagiti kangrunaan a kalsada ken masigurado a natalged ti panagbiyahe dagiti residente ken emergency responders.
Kabayatanna, mangipapaay met ti tulong ti Department of Social Welfare and Development (DSWD) kadagiti pamilya nga adda kadagiti evacuation centers.
Karaman ditoy ti rinibo a family food packs, ready-to-eat meals, ken dadduma pay a relief supplies a naka-preposition iti intero a Bicol Region.
Segun iti DSWD, umaboten iti P39.6 milyon ti naibunong nga ayuda, karaman ti P11.3 milyon para iti Emergency Cash Transfer ken P28.3 milyon iti babaen ti Cash-for-Work program a nakairanudan ti nasurok a 2,000 a mannalon a naapektaran ti aktibidad ti bulkan.
Iti kaudian a datos, nasurok a 300,000 a family food packs ken nasurok a 7,000 ready-to-eat food boxes ti naibunong kadagiti apektado a residente iti rehiyon.
Nangiwaras met ti Department of Health (DOH) ti N95 masks, mobile clinics, ken water stations tapno solusyunan dagiti problema para iti salun-at kas ti panaguyek, marigatan nga umanges ken iritasyon iti mata gapu iti ashfall.
Iti met tulong ti Department of the Interior and Local Government (DILG), naiwaras ti Bureau of Fire Protection (BFP) para iti water spraying ken panangdalos kadagiti dapo kadagiti komunidad.
Indaulwan ti Office of Civil Defense (OCD) ken ti National Disaster Risk Reduction and Management Council (NDRRMC) ti naiget a pannakaipatungpal ti evacuation ken agtultuloy a monitoring kadagiti high-risk area.
Inmandar pay ti presidente ti naiget a panagbantay kadagiti karayan ken ti pagayusan ti danom gapu iti pangta ti lahar, aglalo no makapasar ti napigsa a tudo.
kabayatanna, nabalakadan dagiti residente nga agtalinaed nga alerto, agtalinaed iti uneg ti balay, agsuot ti protective mask, ke suruten dagiti pammilin manipod iti lokal a gobierno.
