Maysa a naladingit a pasamak para ken Ms. Karl Angel Fracisco ti pannakatay ti kabsatna a kameng iti Special Action Force (SAF) a ni PCPL. Kelvin Francisco a naka-deploy idiay Mindanao.
Segun kenkuana, kanayon nga ipakaammo ti kabsatna no adda ti opersion nga isayangkatda ngem idi kalman Abril 4 ket awan ti naawatna a mensahe daytoy ngem nakaawat daytoy ti tawag a mangipakaammo ti ipupusay ti kabsatna.
Inbatadna nga awan ti nakadanon kenkuana no ana dagiti napasamak ket awan mabalinna isot gapuna a nagibasar daytoy kadagiti impormasion a maiparparuk-at online.
Inpakaammona nga arapaap ti kabsat na ti agbalin a suldado idi ubing daytoy ket uray ammona ti risgo ti agbalin a paset ti Special Action Force (SAF) ket inkalukagumna ti sumrek ta kayatna ti agserbi iti pagilian a Pilipinas.
Innayonna a naidanon ti ladawan ti kabsatna iti maudi nga orasna nga adda daytoy ti ospital a nakaiggem ti rosario.
Malaksid iti daytoy, basar kadagiti local a media idiay Mindanao, agladladingit dagiti kameng ti 41st Special Action Company, 4th Special Action Battalion iti Philippine National Police – Special Action Force (PNP-SAF) kalpasan iti ipupusay ni PCPL Francisco gapu iti nadara nga operasion idiay Buadiposo Buntong, Lanao del Sur idi laeng kalman.
Nupay kasta, basar ti inisial nga impormasion, natambangan ti sniper dagiti otoridad kabayatan ti panagturongda iti maysa nga operasion tapno iserbi ti maysa a warrant of arrest kontra iti suspek a nabigbig a ni Sukair Diongkat, nga addaan ti kaso a murder ken attempted murder.
Maipalagip a natay ni Police Corporal Francisco, idinto a nasugatan dagiti tallo pay a kadwana a Special Action Force (SAF), pakairamanan ti maysa a miembro ti Special Operations Group.
Iti agdama, kinunana nga adda idiay Manila ti bangkay ti kabsatna ken maipaayan daytoy ti pammadayaw babaen kadagiti kameng ti Philippine National Police sakbay a maiyawid iti probinsiada nga Isabela kasta met a mannarimaan ti pannakaiwayat ti clearing operations dagiti otoridad iti lugar kabayatan nga im-imbestigarenda ti suspek nga alisto a nakalibas kalpasan ti insidente.
