LAOAG CITY – Sangsangkamaysa a kinondenar dagiti agpanpanday linteg ti Batangas ti alegasyon ti pada da a kongresista a ni Batangas 1st District Representative Leandro Leviste kontra kada Executive Secretary Ralph Recto ken Governor Vilma Santos-Recto.
Maipalagip nga inakusaran ni Leviste dagiti agasawa ti maipagarop nga illegal campaign financing, bribery, ken dadduma pay.
Inpila dagiti agpanpanday linteg ti Batangas ti House Resolution No. 994 a naglaon ti panangkondenar da iti akusasyon ni Leviste, kagiddan ti panangipetteng dagitoy nga agpapada nga awan ti pagibasaran, saan a nainkalintegan ken makaperdi nga akusasyon.
Lima manipod iti innem a mangibagi ti Batangas ti nagpirma iti daytoy a pakairamanan dagiti sumaganad:
6th District – Rep. Ryan S. Rect
5th District – Beverly Rose A. Dimacuha
4th District – Amado Carlos A. Bolilia IV
3rd District – King George V. Collantes
2nd District – Gerville “Jinky Bitrics” A. Reyes-Luistro
Maipalagip nga inrakurak ni Leviste a dadakkel a bulto ti kwarta ti magasgastos iti Batangas tunggal eleksyon.
Inakusaran pay ni Leviste ti amin a kameng ti Kamara de Representantes nga aggatgatang ti botos ngem naiget a kinontra dagiti pada na nga agpanpanday linteg agingga a naan-anay na metlaeng nga inbabawi ti kontrobersyal a rakurak na ken inlawlawag na a saan nga amin no di ket sumagmamano a kongresista laeng ti maipagarop a karaman iti vote buying.
