LAOAG CITY – Namnamaen ti gobierno ti Pilipinas a maiparuk-at ti desisyon iti kiddaw da a mangisyu ti Red Notice ti International Criminal Police Organization (Interpol) kontra ken ni dati a Ppresidential spokesman Atty. Harry Roque.
Segun ken ni Department of the Interior and Local Government (DILG) Secretary Jonvic Remulla, opisyalen a nalpas ti innem a bolan a proseso ti aplikasyon para iti asylum ni Roque iti Netherlands ita a lawas.
Gapu iti daytoy, kuna ni Remulla a possible a maamoan ti desisyon no mapatgan wenno saan ti kiddaw da.
Iti agdama ket wanted ni Roque gapu iti human trafficking case nga adda ti pakainaign ti iligal a Philippine Offshore Gaming Operator (POGO) hub a Lucky South 99 idiay Porac, Pampanga.
Immunan a kiniddaw ti gobierno ti Pilipinas ti Red Notice para ken ni Roque idi Nobiyembre ti napalabas a tawen.
Nagkiddaw met ti asylum ni Roque idiay Netherlands ngem naireport a nai-refer daytoy iti Austria iti babaen ti European Union’s Dublin Regulation, a nakailanadan a ti umuna a member state of entry ti responsable iti panagiproseso ti asylum application.
Segun ken ni Remulla, no saan a mapatgan ti kiddaw ni Roque para iti asylum, mapapanaw manipod iti nasao a pagilian gapu ta awan ti travel papers na ken gapu iti sangsangwen na nga human trafficking case nga ipawpawil ti amin a pagilian.
