LAOAG CITY – Naglikudan ti Malacañang Palace ti alegasyon ni Senator Imee Marcos nga adda ti pannakapwersa ken panagipangta kontra kadagiti agpanpanday linteg tapno suportaran ti impeachment complaint kontra ken ni Vice President Sara Duterte.
Segun ken ni Palace Press Officer Claire Castro, awan ti pagibasaran dagiti akusasyon no saan a buyugan ti nalawag nga ebidensya.
Inrakurak pay ti opisyal ti Palasyo nga arigna narwamen ti sumagmamano a personalidad iti pannakaiparparuk-at dagiti sayangguseng wenno intriga imbes a mangidasar ti kongkreto nga ebidensya.
Dinakamat na pay ni dati a Presidente Rodrigo Duterte mainaig iti nasao a rakurak.
Immunan nga inbatad ni Marcos iti maysa a video statement a maipagarop nga adda ti sumagmamano a miyembro ti kamara de representantes ken senado a sumangsango ti pammubuteng ken mapangpangtaan a makasoan no saan da a suportaran ti impeachment complaint ken ni Duterte.
Segun iti senadora, adda dagiti agpanpanday linteg a maipagarop a mapangpangtaan ti reklamo a maipila iti Office of the Ombudsman, idinto a maipagarop nga us-usaren ti dadduma nga ahensya kas ti Department of Justice (DOJ), National Bureau of Investigation (NBI), ken ti Securities and Exchange Commission (SEC) tapno ipiten dagiti saan a pabor iti impeachment.
Dinakamat pay ni Marcos nga adda ti maipagarop a sumagmamano a pondo dagiti agpanpanday linteg a naitantan kalpasan a namarkaan kas “for later release” wenno FLR, banag a maipagarop a nakaapektar kadagiti proyekto para iti idaulwan da a distrito.
Nupay kasta, saan met a nangipaay ti senadora ti nagan dagiti ng mga opisyal a maipagarop a makapaspasar ti pressure manipud iti administrasyon.
Naikeddeng a pagbotosan ti Kamara de representantes ti articles of impeachment kontra ken ni Duterte, no sadinno a kasapulan ti saan a nababbaba ngem 106 ti botos tapno maipasa daytoy iti senado para iti trial.
