LAOAG CITY – Inlawlawag ti maysa nga Health Practitioner a ni Dr. Alan Taylan, Internal Medicine ti St. Camillus De Lellis Hospital ti maipanggep iti hantavirus.
Segun kenkuana, daytoy ket mikrobio nga aggapu kadagiti bao a mabalin a maiyakar no sumrek ti isbo, katay wenno rugit dagitoy iti bagi ti maysa a tao.
Inbatadna nga agduma ti strain ti hantavirus no idasig iti leptospirosis ngem agpada a sumrek ti bacteria dagitoy iti sugat ti maysa nga indibidual.
Inlawlawagna a ti kangrunaan a maapektaran iti paset ti bagi ti tao no nakaptan ti hantavirus ket ti bato.
Kunana a saan nga insigida a maduktalan no ti maysa nga indibidual ket nakaptan ti hantavirus gapu ta umabot iti sumagmamano a lawas sakbay a makarikna ti sintomas iti nasao a virus.
Innayonna a nakadepende ti sasaaden ti salun-at ti maysa nga indibidual ti kinaalisto iti pannakaiyakar ti hantavirus ti maysa a tao iti sabali a tao.
Mainaig iti daytoy, ti hantavirus ket maysa nga impeksion a maiyakar manipud kadagiti bao iti tao a mangituntunda kadagiti sintomas kas ti gurigor, sakit ti ulo, panagsakit ti bagbagi, panagsakit ti buksit ken panag-vomit.
Maipalagip a natay ti tallo nga indibidual a pakairamanan ti agasawa a Dutch ken German national gapu iti hantavirus a naglugan iti MV Hondius idinto a ti walo a dadduma pay ket mapapati a naapektaran ti virus.
