LAOAG CITY – Kalikagum ti Sangguniang Panlalawigan a maammoan dagiti datos maipanggep kadagiti produkto agrikultura ditoy probinsia.
Daytoy ket babaen ti pannakaurnos ti Implementing Rules and Regulation ti Ilocos Norte Agricultural and Trading Center.
Segun ken ni Vice Gov. Matthew Marcos Manotoc, napinpintas no mausar ti trading center a paglakoan ken paggatangan tapno saan a maatiwan dagiti mannalon.
Inbatadna a babaen iti daytoy ket ammo ti probinsia no ania dagiti aramidenda nga addang tapno matulungan dagiti mannalon kangrunaanna ti pannakabayad dagiti utangda ken saan a kasapulan pay nga umutang dagitoy.
Daytoy ket kalpasan a masdaaw no apay a bassit laeng ti mapaspastrek dagiti mannalon iti laksid dagiti ipapaay a tulong ti gobierno.
Patienna a no mangaramidda ti addang ket agbuteng dagiti traders a manggundaway kadagiti mannalon.
