LAOAG CITY – Inpasingked ni Presidente Ferdinand Marcos Jr. a tinutukan na a naimbag ti napasamak a tension no sadinno nga adda dagiti nangngegan a nagsasaruno a putok ti paltog iti uneg ti senado a nagpaot ti nasurok a dua nga oras.
Iti video ni Presidente Marcos ng inburay na iti Facebook Page na, inbatad na a saan a gobyerno ti nagaramid iti daytoy.
Kuna na nga awan dagiti simrek nga aggapo iti ruwar a soldado, pulis ken kameng ti National Bureau of Investigation iti senado.
Inrakurak pay ti presidente a saanda nga ammo no siasinno dagiti simrek iti senado nagpapaputuk ti paltog.
Innayon na nga apaman a naamoan na ti mapaspasamak a riribok iti senado ket sinaludsud na iti Philippine National Police ken National Bureau of Investigation no tao da ti adda iti likudan ti tension, ngem agpada a naglikudan da daytoy.
Inpalgak pay ni Presidente Marcos nga immunan nga inbilin na iti National Bureau of Investigation a pumanaw da iti senado ken saan nga arestaren ni Senador Ronald ‘Bato’ Dela Rosa gpu iti nagbalin a desisyon ti Korte Suprema iti kiddaw ti senador a pannakaiparuk-at ti Temporary Restraining Order kontra iti pannaipatungpal ti arrest warrant ti ICC no sadinno nga inbilin ti Korte Suprema iti gobierno nga agkomento iti uneg ti 72 nga oras.
Inpakaammo pay ni Presidente Marcos a nakasarita na metten ni Senate President Alan Cayetano mainaig iti napasamak.
Inpasigurado ti presidente nga aggiddan nga agimbestigar ti Senado ken Philippine National Police tapno amwen no siasinno dagiti adda iti likudan ti nasao a pasamak.
Nagpanawagan met ti presidente iti publiko nga agtalinaed a kalmado iti baet ti napasamak.
