LAOAG CITY – Inbatad ti Office of the Ombudsman a mangipila-da ti kaso a plunder kontra ken ni Senador Jinggoy Estrada mainaig iti maipagarup nga anomalia ti flood control projects.
Segun ken ni Ombudsman Jesus Crispin Remulla, pirmaanna ti information kontra iti senador sakbay daytoy a maisubmitir iti Sandiganbayan, a manamnama a maipila inton Huwebes, Mayo 28. Malaksid iti plunder, karaman pay dagiti sumagmano nga adda pakainaiganna iti kaso.
Inlawlawag pay ni Remulla nga adda ti pannakaitantan ti pannakaipila ti kaso gapu ta masapul nga urnosen ken malawlawagn ti resolusion tapno natibtibker ti maipila nga impormasion.
Innayon pay ti Ombudsman nga adda ti sabali pay a karaman ti kaso ngem posible nga agbalin a state witness gapu ta importante ti testimonia-da iti imbestigasion.
Kabayatanna, naiget a naglikudan ni Estrada ti aniaman a pannakairamanna iti iregularidad ken inpetteng ti kampo-na nga awan ti ebidensia-da mainaig kadaytoy.
