LAOAG CITY -Nagpangta ni US President Donald Trump a rauten da ti Oman, a maysa a mabigbig a kaalyado ti Amerika, no saan nga agpatang wenno ag-“behave”.
Inaramid daytoy ti presidente ti Amerika kalpasan dagiti report mainaig iti maipagarop a negosasyon iti nagbaetan ti Iran ken Oman.
Basar kadagiti report, agplanplano ti dua a pagilian nga agkadwa a mangipataw ti toll kadagiti barko a dumalyasat iti Strait of Hormuz.
Ti Strait ket maysa a kritikal a ruta para kadagiti oil tanker iti intero a lubong a temporaryo a napaserran sipud rimsua ti gubat ti Estados Unidos ken Israel kontra iti Iran.
Immunan nga indeklarar ni Trump idi martes a malukatan manen ti Strait para iti amin ken inpetteng na nga awan ti siasinno man a pagilian nga addaan ti karbengan a mangkontrol iti daytoy.
Innayon na a bantayan ti Amerika ti lugar kas paset ti maipatpatungpal a negosasyon.
Iti agdama, awan pay ti inparuk-at a naan-anay a palawag ti White House mainaig iti kontrobersiyal a rakurak ni Trump, ken saan pay a nangipaay ti opisyal a sungbat ti Embahada ti Oman iti Washington maipanggep iti nasao nga isyu.
