LAOAG CITY – Naiserbin ti Police Regional Office 11 (PRO 11) ti order a pannakaibabawi ti lisensiya dagiti paltog ni Sen. Ronald Dela Rosa.
Naamoan a naiserbi dagiti dokumento ken ni Atty. Vicente Adrian Pajaro, ti legal representative ni Sen. Dela Rosa.
Segun iti PNP-Regional Civil Security Unit 11 (RCSU 11), indaulwan ti Davao City Police Office ti panangiserbi ti Order of Revocation para iti License to Own and Possess Firearms (LTOPF) ken Firearms Registrations (FR) ti aglelemmeng a senador.
Inbatad ni Davao Region Director PBGen. Leon Victor Z. Rosete, immunan a nangisayangkat ti koordinasyon ti regional office iti local police tapno maurnus ti panangiserbi ti revocation order.
Nagbalin met a naurnus ti panangawat ni Atty. Pajaro iti nasao nga order ken nagkari a kasarita na ti kliyente na para iti daytoy.
Nagkari pay ti abogado a makikoordinar to manen iti law enforcement agencies para kadagiti paltog ti dati a Philippine National Police chief.
Iti agdama, awan pay ti impormasyon no naisublin iti PNP dagiti paltog ti senador a mapatta-patta nga umabot iti nasurok a 100 a bukbuklen ti shotgun, rifle, handgun, ken dadduma pay.
