LAOAG CITY – Insingasing ni Senador Panfilo “Ping” Lacson nga adda ti alternatibo a wagas tapno makaatendar dagiti Senador a sumangsango iti posible a panangarestar wenno pannakaibalud iti impeachment trial ni Vice President Sara Duterte a saan a kasapulan nga agusar ti online participation.
Inbatadna a mabalin nga agkiddaw ti Impeachment Court ti pammalubos wenno “leave of court” manipud iti Sandiganbayan wenno dadduma pay a korte no sadinno a nakapenpen ti kaso dagiti apektado a Senador.
Inlawlawagna a no daytoy ket napalubosan, mabalinda nga ikabil dagitoy iti Senado iti babaen ti Bureau of Jail Management and Penology tapno makaatendar ti personal iti panangusig.
Inpettengna a saan nga ipalpalubos ti agdama a Senate Rules ti online participation ken voting malaksid laeng no adda ti nakaro a kalamidad, force majeure wenno national emergency.
Innayon ni Lacson a ti impeachment trial ket maysa nga espesyal a korte ti Senado nga inkeddeng ti Konstitusion isu a kasapulan ti pisikal a presensia dagiti senator-judges.
