LAOAG CITY – Maysa nga independent watchdog group ti irubuat tapno tutukan ti impeachment trial iti Senado ken labanan dagiti iwaras a saan nga umno nga impormasion ken tumulong iti publiko nga ad-adda a maawatan ti proseso ti impeachment mainaig iti umas-asideg a panangusig ken ni Vice President Sara Duterte.
Inanunsio ni TEAM PINAS Executive Director Carlo Flores ti panangirubuat ti Bantay Senado a maysa a pammilin a maiyataday iti tallo a prinsipio: truth-telling, bridge-building ken change-making.
Dinakamatna a nagbaliw ti “complexion” ti impeachment trial ita a tawen gapu iti panagraira ti disinformation ken panagusar ti AI tools.
Inlawlawagna a ti partikular a kangrunaan a trabaho ti grupo iti panagdengngeg ket ag-monitor no sadinno a tutukan dagiti volunteer ti kada tukad ti panangusig ken idokumento dagiti pasamak; agpalawag iti simple a pagsasao ti proseso ti impeachment iti babaen kadagiti panangtalantan iti barangay, simbaan ken pagadalan; ken mangpalagip kadagiti Senador ken opisial iti responsibilidadda ken pagsungsungbatanda kadagiti umili.
