LAOAG CITY – Maysa a Nepali mountain guide ti nakalasat kalpasan a na-stranded daytoy iti Mount Everest iti agarup innem nga aldaw nga awan ti umdas nga oxygen, taraon ken nasayaat a pagtarusan.
Nabigbig ti lalaki a ni Dawa Sherpa nga inpagarup a pimmusayen kabayatan a bumabbaba manipud iti tuktok ti Everest kalpasan a saanen a ma-contact daytoy.
Nupay kasta, kalpasan ti innem nga aldaw, nabirokan isuna a sibibiag ti cleanup team kabayatan nga agin-inayad daytoy a bumabbaba nga agturong iti Everest Base Camp.
Insigida a nailugan daytoy iti helicopter ken naitaray iti ospital iti Kathmandu no sadinno a maag-agasan isuna gapu iti dehydration, frostbite ken tukkol iti tulang.
Inbatad ti lalaki a napukawan isuna ti oxygen kabayatan nga adda iti nangato a paset ti bantay isut gapuna a saanen a makagaraw a nasayaat daytoy.
Kunana nga awan ti maipaunegna a taraon iti umuna a dua nga aldaw ken ti laeng kakaisuna a wagas tapno mabiag isuna ket ti panagngal-ngal ti yelo tapno makainum ti danum.
Nakakita pay isuna ti sumagmamano a tsokolate iti bulsana a nakatulong tapno agpaut ti sumagmamano nga aldaw iti bantay.
