LAOAG CITY – Nangiwaras ti Philippine National Police (PNP) ti nasurok a 55,000 a security personnel iti intero a pagilian ks paset ti Oplan Balik-Eskwela para iti School Year 2026–2027.
Segun ken ni Philippine National Police chief Police General Jose Melencio Nartatez Jr., karaman iti deployment ti 28,751 PNP personnel, 4,079 manipod iti dadduma pay nga unit, ken 22,677 force multipliers manipod kadagiti partner agency ken community organizations.
Nangikabil met ti Philippine National Police ti 9,319 Police Assistance Desks kadagiti pagadalan ken nangiwaras ti 9,525 mobile patrol units tapno mapapigsa ti seguridad, traffic management, ken alisto a panagresponde kadagiti school zone.
Inpasigurado ni Nartatez kadagiti nagannak ken estudyante a nagtalinaed a natalged dagiti pagadalan iti panaglukat ti klase.
Iti agdama, agarop 26 a milyon nga estudyante ti nakaenrolen para iti School Year 2026–2027, ken manamnama nga umabot iti sumuruk-kumurang a 26.4 milyon ti pakabuklan ti bilang dagiti agad-adal ita a tawen.
