LAOAG CITY – Mangnamnama ti Kamara de Representantes a saan a maapektaran iti mapaspasamak a riribok iti Senado ti naikeddeng nga impeachment trial ni Vice President Sara Duterte kagiddan ti panangbigbig daytoy iti panangidaulo ni Acting Senate President Sherwin Gatchalian.
Inbatad ni Deputy Speaker Paolo Ortega a natungpalen ti Kamara de Representantes ti konstitusionalda a responsibilidad mainaig iti impeachment proceedings ken nakasagana nga ituloy ti Senado ti sumaruno a tukad ti proseso.
Kunana a mangnamnamada a maresolbaren ti Senado ti riribok tapno mairugin ti panangusig.
Dinakamat ni Ortega ti nangato a tukad ti interes ti publiko iti nasao a banag.
Kunana a basar iti lokal a sentiment survey, sumurok 86 a porsiento kadagiti respondent ti agsalsaludsod no inton ano a mangrugi ti impeachment proceedings.
Iti baet ti riribok dagiti kampo da Senador Sherwin Gatchalian ken Senador Alan Peter Cayetano, inpetteng ni Ortega a saan daytoy a nasken nga agbalin a rason tapno maitantan ti panangusig.
Inpettengna a napateg a maipaayan ti sungbat dagiti saludsod ti publiko mainaig kadagiti alegasion kontra iti Bise Presidente aniaman ti agbalin a resulta ti panangusig iti Senado.
Naikeddeng a rugian ti Senado ti impeachment trial ni Vice President Duterte inton Hulio 6 no sadinno a talantanen ken denggen dagiti reklamo nga inpila kontra kenkuana.
