LAOAG CITY – Napilaan ti kaso ti maysa a senior citizen gapu iti panaglabsingna ti ‘Anti-Bomb Joke Law’ ditoy siudad ti Laoag.
Daytoy ket maysa a baket nga agtawen ti 64 a residente iti Brgy. Zamboanga iti isu met laeng a siudad.
Inbatad ni PLTCol, Ryan Retorar ti Chief of Police ti Philippine National Police (PNP) Laoag a daytoy ket gapu ti panagangaw ti senior citizen nga adda ti bomba iti uneg ti bagna apaman a sumrek daytoy ti dakkel a mall ti nasao a siudad.
Idinto a sumrek daytoy ket inkiddaw dagiti security guard nga i-check ti bagna ket nagkedked daytoy isu ti gapu na a nagkiddaw ti tulong dagiti guards kadagiti otoridad.
Naamoan a daytoy ket angaw laeng ti maysa a senior citizen ket awan ti nauneg a rasonna.
Gapu iti daytoy, kuna ni Retorar a daytoy ket nalawag a panaglabsing ti ‘Anti-Bomb Joke Law’ ditoy siudad.
Kunana a ti management ti dakkel a mall ti nangipila ti kaso.
Nupay kasta, uray napilaan daytoy ti kaso, nakaruar met laeng ti pagbaludan kalpasan a nagpiyansa ti Php30, 000 para iti temporario a pannakawaya-wayana.
Kabayatanna, nagballaag ni Retorar iti publiko a liklikan dagitoy gapu ta saan a napintas nga aramid daytoy.
