LAOAG CITY – Umaboten iti 38 a tattao dagiti natay iti idadayyeg ti magnitude 7.8 a gingined iti kabaybayan a paset ti Sarangani idi Lunes, Hunyo 8, 2026.
Basar iti kaudian a report ti Office of Civil Defense (OCD), uppat nga indibidual ti nagtalinaed a mapukpukaw idinto nga 478 dagiti nasugatan.
Inbatad ti Office of Civil Defense a karaman kadagiti kangrunaan a naapektaran ti gingined ke iti General Santos City, Sarangani, ken South Cotabato.
Ado paylaeng a pamilya ti napilitan a nagbakwit gapu iti perdisyon nga intunda ti didigra kadagiti pagtaengan da.
Mapatta-patta nga umabot iti nasurok a P562.8 million ti balor dagiti nadadael kadagiti imprastraktura iti Davao Region ken SOCCSKSARGEN.
Kabayatanna, agtultuloy paylaeng dagiti mapaspasaran nga aftershock iti lugar.
Segun iti Philippine Institute of Volcanology and Seismology (PHIVOLCS), nakairekorden ti 1,209 aftershocks sipud timmama ti napigsa a gingined.
Iti agdama, nakatutuk dagiti otoridad iti search, rescue, ken retrieval operations tapno matulungan dagiti naapektaran ken mabirukan dagiti mapukpukaw nga indibidwal.
Nasurok a 2,700 a kameng ti Armed Forces of the Philippines, Philippine National Police, ken Bureau of Fire Protection ti naipatulod kadagiti kangrunaan a naapektaran a lugar tapno tumulong iti operasyon.
