LAOAG CITY – Natay ti maysa a senior citizen a babai kalpasan a nagtnag ken nagbaliktad ti nagluganan da a Toyota Fortuner iti irigasyon iti paset ti Barangay Sta. Cruz iti ili iti Badoc.
Daytoy ti inbatad ni Police Capt. Elison Pasamonte, ti chief of police iti ili ti Badoc.
Segun ken ni Pasamonte, inadmitir ti driver a nakaturog no sadinno a kabayatan ti kaadda da iti agkurba a paset ti kalsada ket bigla a pimmapas ti taray ti behikulo.
Kuna na a possible a napaddakan ti driver ti silinyador ti lugan gapu iti pannakairidep na a nangitunda iti napasamak a disgrasya.
Inpakaammo ni Pasamonte nga adda ti innem nga indibidual nga agkakabagyan a nakalugan iti nasao a Toyota Fortuner a pakairamanan ti tallo a senior citizen a babbai, ken dagitoy ket agpapada a taga Langanilang, Abra ken agturong koma dagitoy iti Sta. Praxedes iti probinsya ti Cagayan iti napasamak ti insidente.
Naitaray dagiti biktima iti Mariano Marcos Memorial Hospital and Medical Center iti ciudad ti Batac ngem naideklarar a dead on arrival ti maysa kadagiti senior citizen gapu iti nakana a sinagaba na a sugat idinto a dagiti dadduma ket agtultuloy paylaeng a matamtaming da.
Mainaig iti daytoy, inrakurak ni Pasamonte nga agpannuray iti pamilya dagiti biktima aglalo ti pimmusay no pilaan da ti reklamo ti driver wenno saan.
Kabayatanna, inbatad ni Police Capt. Pasamonte a saan a maibilang nga accident prone area ti nakapasamakan ti insidente no di ket napasamak laeng daytoy gapu iti pannakairidep ti driver.
