LAOAG CITY – Inpakaammo ni Mr. Alvin Luciano Ubasa, Social Insurance Officer I ken Public Relations Officer Designate ti PhilHealth nga adda ti lima a pharmacy wenno parmasia ditoy probinsia ti maibilang nga accredited iti PhilHealth GAMOT wenno Guaranteed and Accessible Medications for Outpatient Treatment.
Segun kenkuana, karaman ditoy ti Mariano Marcos Memorial Hospital and Medical Center, Pagudpud Adventist Wellness Center, Botikang Pinoy iti siudad ti Batac, Generika iti ili ti Bacarra, Generika iti siudad ti Batac ken Laoag.
Inbatadna a mabalin nga ag-avail babaen kadagiti lima nga accredited facilities kadagiti nagduduma a benepisio nga agdagup ti 20 ribu a pisos.
Mainaig iti daytoy, kuna ni Ubasa nga adda ti 25 a YAKAP wenno Yamang Kalusugan Program accredited facilities ditoy probinsia nga adda ti 41,576 ti nakarehistro ngem 4,886 laeng ti nakaisayangkat ti first patient encounter.
Inlawlawagna a masapul nga agparehistro ken usarenda dagiti benepisio ti Yaman ng Kalusugan Program.
Kunana a gagem ti programa a mangipaay ti tulong kadagiti Pilipino nga agkasapulan ti health assistance ken matagiben ti salun-atda kontra iti sakit.
Inpannakkelna a ti Yaman ng Kalusugan Program ket nagbinnuligan dagiti Rural Health Units ken Government Hospitals no sadinno a dagiti pasilidad ken serbisio nga awanan ti maysa a balay pagagasan ket mabalin a mai-refer kadagiti ospital nga adda iti naan-anay a pasilidadna.
Kabayatanna, inlawlawagna a saan laeng a dagiti principal members ti PhilHealth ti mabalin a maipaayan ti health assistance no diket mabalin pay a maikkan ti tulong dagiti qualified dependents-da.
Ti PhilHealth Yaman ng Kalusugan Program ket maysa a programa ti gobierno tapno matulungan dagiti Pilipino a mangtagiben ti salun-atda ken maliklikan ti nagduduma a sakit.
