Pannusa ti China ken ni Teodoro, insulto iti Pilipinas – Sen. Pangilinan 

LAOAG CITY – Inawagan ni Senador Francis Pangilinan a maysa nga insulto iti Pilipinas ken kumarkaro a pananggipit ti China ti inpataw a sanctions kontra ken ni Defense Secretary Gilberto Teodoro Jr. mainaig iti West Philippine Sea.

Nagpanawagan ni Pangilinan iti Department of Foreign Affairs (DFA) a mangipila ti pormal a protesta kontra iti addang ti China a mangipawpawil ken ni Teodoro ken ti pamiliana a makastrek iti mainland China, Hong Kong ken Macau.

Kunana a dagiti rakurak ni Teodoro ket maipadalan iti opisial a pagannurotan ti Pilipinas.

Inlawlawagna a ti addang ti China ket maysa a “clear escalation” kontra iti Pilipinas a pinili a dumalan iti legal ken nakappia a wagas pakairamanan ti 2016 Arbitral Award tapno ipetteng dagiti karebbengan daytoy iti West Philippine Sea.

Kabayatanna, inpaganetget ti China a ni Teodoro ket paulit-ulit a nagaramid dagiti maipagarup nga “irresponsible remarks” kontra iti pagilian ken nangitunda ti saan a napintas a relasion ti dua a grupo isut gapuna nga inpataw ti sanctions tapno protektaran ti soberania ken seguridad.

Para ken ni Pangilinan, nasken a mangipasa ti pormal a diplomatic protest ti Department of Foreign Affairs.