LAOAG CITY – Inbutaktak ni Davao City 1st District Rep. Paolo Duterte a maipagarop nga addan ti inparuk-at nga arrest warrants ti International Criminal Court (ICC) kontra ken ni Senador Bong Go ken dua a dati a pulis.
Segun ken ni Duterte, maipagarop nga aggapo iti “highly reliable source” ti impormasyon na, ngem awan pay ti opisyal a kumpirmasyon manipod iti ICC.
Gapu iti daytoy, kwinestyunaran ti agpanpanday linteg ti maibagbaga a panangusar iti ICC kas “political weapon” kontra kadagiti kalaban ti administrasyon iti pulitika.
Maipalagip nga immunan nga inbatad ni dati a Senador Antonio Trillanes IV a possible a target ti ICC ni Go kas maipagarop a “co-perpetrators” ni dati a Presidente Rodrigo Duterte mainaig iti nadara a ‘war on drugs.’
Mabigbig pay ni Go kas dati a nagserbi nga Special Assistant to the President ni Duterte.
Kabayatanna, naglikudan ti Department of the Interior and Local Government (DILG) ken ti Philippine National Police (PNP) ti rakurak ni Pulong Duterte, nga agpada a nangibaga nga awan ti naawat da a pormal nga impormasyon wenno dokumento mainaig iti maibagbaga nga ICC warrants.
Innayon ti Philippine National Police a no bilang adda ti legal a pammilin manipod iti umiso nga otoridad ken dumaan iti umiso a proseso ket nakasagana da a mangipatungpal daytoy kas maiyataday iti linteg.
