LAOAG CITY – Naiget a naglikudan ti Department of Interior and Local Government (DILG) Secretary Jonvic Remulla nga adda naiparuk-at a warrant of arrest manipud iti International Criminal Court (ICC) kontra ken ni Senator Christopher ‘Bong’ Go ken dagiti dati a dua a pulis.
Inbatad ni Remulla nga awan pay naawat dagiti otoridad a dokumento manipud iti International Criminal Court kontra iti nadakamat a Senador ken iti dua a kapulisan.
Ti nasao nga inpormasion ket kalpasan a dinakamat ni Davao City Representative Paolo “Pulong” Duterte iti social media na nga adda ti reliable source-na nga adda ti inparuk-at ti ICC warrants kontra ken ni Go ken dagiti dua a nadakamat a pulis.
Kabayatanna, inpetteng ni Remulla a basar iti pinagsaritada ken ni Justice Secretary Fredderick Vida ket awan pay ti naawatda a dokumento ken ti Philippine National Police mainaig iti ICC warrants.
