LAOAG CITY – Kinumpirmaran ti Swiss Foreign Ministry a naitantan ti nakaplano a panagsarita iti nagbaetan ti Estados Unidos ken Iran a maiyuswat koma iti mountain resort ti Bürgenstock iti Switzerland.
Iti maysa nga opisyal a rakurak, inpetteng ti ministry a nagtalinaed a nakasagana ti Switzerland nga agserbi kas mediator iti dayalogo ti dua a pagilian.
Nupay awan ti naipaay a baro a petsa no kaano a matuloy ti panagsarita ti dua a pagilian, agtultuloy paylaeng ti panagsagsagana iti Bürgenstock.
Immunan nga inrakurak ti White House a saanen nga agbiyahe ni US Vice President JD Vance nga agturong iti Switzerland gapu ta saan pay a pinal dagiti plano para iti nasao a dayalogo.
Iti agdama, adda ti 60 nga aldaw ti Estados Unidos ken Iran tapno ipinal ti katulagan a gagem na nga ileppasen ti gubat.
Basar iti report, makumikum iti agdama ti agsumbangir a partido iti panangbukel kadagiti “secret proposal” para iti pannakaipatungpal ti 14 points deal a napirmaan ita a lawas karaman dagiti detalye no kasanu a solbaren ti masakbayan ti nuclear program ti Iran.
