LAOAG CITY – Masapol nga agtultuloy ti proseso ti impeachment kontra ken ni Vice President Sara Duterte kalpasan a nagbalin a natalged ti liderado ti Senado.
Daytoy ti nagbalin a rakurak ni House Committee on Higher and Technical Education Chairperson ken TINGOG Party-list Representative Jude Acidre.
Segun ken ni Acidre, saan a makapasayaat iti umili no pabayagen pay ti proseso gapu ta nakadepende ditoy ti panagtalek ti publiko iti gobierno ken dagiti demokratiko nga institusyon.
Inpetteng ni Acidre a normal iti maysa a demokrasya ti agduduma nga opinyon dagiti Pilipino, ngem saan a rumbeng nga usaren a rason tapno pabayagen, riribuken wenno pulitikaen ti panagdengngeg.
Inbatad pay ti agpanpanday linteg a napateg a magna ti kaso iti maysa a patas, naurnus ken nakapapati a wagas.
Iti babaen daytoy, maipaayan ti agsumbangir a partido ti umiso a gundaway tapno mangidatag kadagiti argumento ken ebidensya, ken masungbatan dagiti saludsud ti publiko.
Pinalagipan met ni Acidre ti amin a ti impeachment ket masapol a ti pagibasaran ket ti ebidensya ken kinapudno, imbes nga idalan iti kinaringgor, pressure wenno panagpulitika.
Innayon na a ti nasao nga isyu ket saan laeng a maipanggep iti gasat ti maysa nga opisyal no di ket pammaneknek iti umili nga aggungunay dagiti linteg ken institusyon iti pagilian iti naannayas ken nainkalintegan a wagas.
