LAOAG CITY – Nairekord ti Spain national football team ti umuna a panangabakda iti FIFA World Cup 2026 kalpasan nga inabakda ti Saudi Arabia national football team iti score a 4-0 iti Group H match-da.
Indauloan ni Lamine Yamal ti opensiba ti Spain kalpasan a nairekord ti umuna a goal ti koponan iti maika-10a minuto ti ay-ayam.
Pinasarunoan daytoy ti dua a nagsaruno a goal ni Mikel Oyarzabal tapno palawaen ti lamang ti Spain sakbay nga aglippas ti umuna a kagudua ti ay-ayam.
Nanayonan pay ti puntos iti maikadua a paset ti laban kalpasan ti maysa nga own goal manipud iti depensa ti Saudi Arabia.
Gapu iti panangabak, ngimmato ti Spain iti uppat a puntos iti Group H kalpasan ti scoreless draw-da kontra iti Cape Verde iti umuna a laban.
Nagtalinaed iti maysa a puntos ti Saudi Arabia ken kasapulan a mangabak ti nabatbati nga ay-ayamda tapno mapagtalinaed ti namnama a makastrek iti sumaruno a tukad ti torneo.
Kabayatanna, agpada a saan a naka-score ti koponan ti Belgium ken Iran iti labanda iti Group H.
Nangipakita ti kinalaing dagiti goalkeeper ti dua a pagilian. Sumagmamano a napapateg a save ti inaramid ni Thibaut Courtois para iti Belgium idinto a nagbalin a natibker met ni Alireza Beiranvand iti pananglapped kadagiti panangatake ti Belgian side.
Ad-adda pay a nagbalin a narigat ti laban para iti Belgium kalpasan a nakissayan ti maysa nga umaayam iti maudi a paset ti laban gapu iti red card ngem saand daytoy a nagbalin nga abanse ti Iran tapno maka-score iti ay-ayam.
