LAOAG CITY – Natay ti driver ti motorsiklo kalpasan ti panagdinnungparda iti maysa a van iti Barangay 17, Tabug iti siudad ti Batac.
Segun ken ni P/Lt.Col. Jerome Wangkey, Hepe ti Batac City Police Station, ti driver ti motorsiklo ket agtawen ti 22 ken residente ti Barangay Capangdanan iti ili ti Pinili idinto a ti nangiturong ti van ket agtawen ti 35 ken residente ti Barangay Bil-loca iti siudad ti Batac.
Inbatadna a basar iti inwayatda nga imbestigasion, kabayatan a dumaldalyasat ti motorsiklo nga agturong nga agpa-abagatan ket maipagarup a kellaat nga immagaw ti linya ti kalsada ti van nga agturong met nga agpa-amianan a nangitunda ti panagdinnungparda.
Inlawlawagna a gapu iti kinapigsa ti impact ti disgrasia ket naitapwak pay ti van iti maysa a derraas idinto a nawarwara ti motorsiklo.
Naitaray ti biktima iti ospital para iti naan-anay a pannakatamingna ngem naideklarar a dead on arrival babaen ti attending physician.
Kunana nga agpada nga adda iti impluwensia ti nasanger ti dua a driver nga aggapu dagitoy iti maysa pasken wenno pagiinuman.
Naammoan a saan a nakasuot ti protective helmet ken reflectorized vest ti driver ti motorsiklo idi napasamak ti disgrasia.
Innayonna a nagsasarita metten ti dua a partido no sadinno nga inpasigurado ti driver ti van a tumulong iti pamilia ti biktima.
