LAOAG CITY – Agsagsaganan ti Ilocos Norte Sports Development Office iti pannakaisayangkat ti Ilocos Cycling Tour inton Hulio 5.
Inlawlawag ni Mrs. Helen Rose Domingo, Ilocos Norte Sports Development Officer a ti nasao nga aktibidad ket maysa a “recreational” a silulukat para kadagiti amin a bumibisikleta iti sadinoman a paset ti pagilian.
Inbatadna nga agturong dagiti makipartisipar iti nasao nga aktibidad kadagiti “tourist destinations” ti Ilocos Norte.
Siraragsak a nangipakaammo nga iti agdama ket addan ti nasursurok ngem 100 a bumibisikleta manipud iti ruar ti probinsia kangrunaanna idiay Metro Manila ti siguradon a makipartisipar kalpasan a nakaparehistron dagitoy.
Kunana a malaksid kadagiti taga Manila ket adda pay dagiti taga siudad ti Baguio ken probinsia ti La Union a nagrehistro.
Mangnamnama ni Domingo nga umadu pay dagiti agrehistro manipud iti ruar ti probinsia tapno makatulong dagitoy a mangpaganaygay iti turismo ditoy probinsia.
Innayonna nga iti agdama ket umab-aboten iti 270 dagiti nagrehistro a makipaset iti nadakamat nga aktibidad.
